ရှမ်းပြည်နယ်ထွက် အော်ဂဲနစ်လက်ဖက်ခြောက် ဥရောပ ဈေးကွက် ရလာ ဟုဆို

ရှမ်းပြည်နယ်အတွင်းမှ ထွက်ရှိတဲ့ အော်ဂဲနစ်လက်ဖက်ခြောက်များကို ဥရောပဈေးကွက်သို့ တင်ပို့ရောင်းချနေရာ ကြိုက်နှစ်သက်မှုများလာ၍ ဈေးကွက်နေရာရလာတယ်လို့ မြန်မာ့ကုန်သွယ်မှု မြှင့်တင်ရေးအဖွဲ့ ကမ္ဘာ့ကုန်သွယ်မှု မြှင့်တင်ရေးအဖွဲ့မှ သိရှိရပါတယ်။

ရှမ်းပြည်နယ် ကျောက်မဲ၊ နမ့်စန်၊ ပင်းတယ၊ ပင်လောင်း၊ မိုင်းကိုင်၊ မိုင်းရှူးစတဲ့ မြို့နယ်များ၌ လက်ဖက်ကို အဓိကစိုက်ပျိုးပြီး ထွက်ရှိတဲ့ လက်ဖက်အစိုနှင့် လက်ဖက်ခြောက်များကို ပြည်တွင်းဈေးကွက်သို့ အဓိကထား ရောင်းချနေပြီး၊ အော်ဂဲနစ်လက်ဖက်ခြောက်ကိုတော့ ဂျာမနီနိုင်ငံအပါအဝင် ဥပရောပဈေးကွက်သို့ အနည်းငယ်သာ တင်ပို့ရောင်းချနေတာပါ။

အော်ဂဲနစ် လက်ဖက်ခြောက်ဟာ ပင်းတယမြို့နယ်ဘက် တင်ပို့နေတာဖြစ်ပြီး ဘလက်တီး(black tea)၊ ဂရင်းတီး(green tea)၊စတဲ့ လက်ဖက်အမျိုးအစားတွေကိုလည်း ဥရောပဈေးကွက်သို့ အနည်းငယ်တင်ပို့ကြောင်းလည်း သိရှိရပါတယ်။ ထို့အပြင် လက်ဖက်အစိုကိုလည်း ကောင်းမွန်သောထုပ်ပိုးမှုစနစ်ဖြင့် အမေရိကန်၊ အင်္ဂလန်စတဲ့ နိုင်ငံများသို့ အနည်းငယ်စမ်းသပ်တင်ပို့နေတယ်လို့လည်း မြန်မာ့ကုန်သွယ်မှုမြှင့်တင်ရေးအဖွဲ့ ကမ္ဘာ့ကုန်သွယ်မှု မြှင့်တင်ရေးအဖွဲ့မှ သိရှိရပါတယ်။

မြန်မာ့နိုင်ငံမှာ လက်ဖက်ကို ရှမ်းပြည်နယ်တွင် အဓိကစိုက်ပျိုးပြီး ချင်းပြည်နယ်နှင့် ကချင်ပြည်နယ်တို့တွင်လည်း အနည်းငယ်စိုက်ပျိုးနေကာ မြန်မာ့လက်ဖက် စိုက်ပျိုးရာတွင် ဓာတုဓာတ်မြေဩဇာသုံးစွဲမှု မရှိဘဲ မိရိုးဖလာနည်းဖြင့် စိုက်ပျိုးလို့ ရှမ်းပြည်နယ်က လက်ဖက်များဟာ ပြည်တွင်းရော ပြည်ပဈေးကွက်တွင်ပါ ဈေးကွက်ဝင် ကြိုက်နှစ်သက်မှုများတဲ့ စိုက်ပျိုးရေးထုတ်ကုန်အဖြစ် ရပ်တည်နေတာဖြစ်တယ်လို့ သိရှိရပါတယ်။